經常會有一啲洗牙嘅顧客會問：

點解我洗完牙

醫生叫我做「齦下刮治」

話齦下結石如果放任唔理

會引起牙周炎、導致牙齒鬆動直至脫落？

有咁誇張嗎？有咁危險咩？

我哋知道

牙結石幾乎人人都有

但係今日要同大家傾下嘅可唔係普通嘅牙結石

佢嘅殺傷力比普通牙結石強多咗

佢——就係齦下結石

剛開始形成嘅牙結石係乳白色嘅軟垢，用牙刷或者牙線就可以清除走，但係當佢變硬之後就唔咁容易對付咗。呢個時候，牙結石就喺牙齒同牙齦嘅交界處沉積同繁殖，面積愈黎愈大，亦愈黎愈厚同硬。

牙結石對口腔黎講就係一種異物，佢會不斷嘅壓迫牙齦同刺激牙周組織，咁樣一來牙結石就由牙冠向下擴散，牙齦就會一日一日退縮，牙槽骨亦會一日一日吸收，耐用耐之後，牙齒漸漸鬆動，佢就會乘虛而入攻擊牙根。

牙齦下面嘅牙結石肉眼睇唔到，一般呈啡色或者黑色，附著更加牢固，加上牙結石容易吸附細菌/毒素，再加上佢本身對牙周組織嘅刺激，會令牙齦內側潰瘍，唔易癒合，導致牙齦出血，牙周疾病加重，口臭，牙周袋，牙齒鬆動甚至脫落等等。而且肉眼看唔到，有時一顆本來無事嘅牙竟然鬆動脫落，都係齦下牙結石惹嘅禍！

牙周病同蛀牙唔同，蛀牙可以通過填補嘅方式改善，但係牙槽骨一旦吸收就好難再生。舉個老生常談嘅例子：牙槽骨就好似土壤，牙齒就係樹，一旦土壤流失咗，咁樹木亦好難生存。

洗牙，係將牙垢同硬嘅牙結石除去嘅最好方法。我哋平時嘅洗牙只係進行牙齦上嘅結石，牙齦下有牙結石嘅，就要進行齦下刮治。

齦下刮治就係將工具深入牙齦乳頭下刮走牙根表面感染嘅病變牙骨質，以及牙周袋內嘅牙結石同菌斑，刮得乾淨唔乾淨，都係體現牙醫技術嘅關鍵。過程亦好刺激，所以需要打麻藥。

最後，齦下牙結石處理後牙周組織能唔能恢復正常，要視乎牙周組織本身嘅病況而定，若冇恢復正常，就要進行下一步治療。若恢復正常咗，定期檢查同埋潔治就可以。